• 

ধৰক, আশংকা কৰাৰ দৰেই এনে এটা দিন আহিল, কোম্পানীৰ চাকৰীটো আপোনাৰ নাথাকিলগৈ।মনৰ পচন্দৰ বেলেগ এটা চাকৰী গোটাবলৈ আপোনাক সময়ৰ প্ৰয়োজন হ’ব।হিচাপ কৰি আপুনি দেখিলে যে যিখিনি টকা বেংকত আছে সেইখিনিৰে তিনিমাহ চলি যাবলৈ অসুবিধা নহ’ব। কিন্তু আপুনি বিচাৰিছে অন্তত: ছমাহৰ পৰা এবছৰমান সময়ৰ এটা আপদকালীন পুঁজি গঠন হওক। কিন্তু কেনেকৈ? যিহেতু উপাৰ্জন নোহোৱা হ’ল নিশ্চিতভাৱে আপোনাৰ হাতৰ পৰা ওলাই যোৱা টকাকেইটাৰ পৰিমাণ কমাব লাগিব।পাকঘৰৰ খৰচ, ল’ৰা-ছোৱালীৰ স্কুলৰ খৰচ, গৃহঋণৰ কিস্তি, বাইক-আৰু গাড়ীখনৰ বীমাৰ খৰচ আদিত আপুনি হাত ধৰিব নোৱাৰে। আপুনি মনস্থ কৰিলে চৌখিন পিন্ধা-উৰা, আমোদ-প্ৰমোদৰ খৰচত হাত ধৰিব।স্বাস্থ্য বীমা, জীৱন বীমাৰ নামত চলি থকা এনড’মেন্ট আৰু ইউলিপ পলিচীকেইটাৰ লগতে মিউচুৱেল ফাণ্ডৰ চিপকেইটাৰ বাবে আপোনাৰ বেংকৰ একাউণ্টৰ পৰা টকাকেইটা ওলাই যোৱা কাৰবাৰটোও সাময়িকভাৱে বন্ধ কৰাৰ চিন্তাও আপুনি নকৰা নহয়।

ভুল নকৰিব – স্বাস্থ্য বীমা কোনো কাৰণতেই আপুনি বন্ধ কৰা উচিত নহয়।এই সময়ত আপোনাৰ বাবে স্বাস্থ্য বীমাৰ গুৰুত্বই সৰ্বাধিক।ইয়াৰ পাছতেই আহিব আপোনাৰ জীৱন বীমাৰ কথা। আলোচনাৰ স্বাৰ্থত ধৰি ললোঁ আপোনাৰ কোনো টাৰ্ম ইনচুৰেঞ্চ নাই। মাত্ৰ এনড’মেণ্ট আৰু ইউলিপ পলিচীকেইটাৰ জৰিয়তে পোৱা বীমাৰ মুঠ পৰিমাণটোৱেই একমাত্ৰ জীৱন বীমা। আপুনি এদিন টাৰ্ম বীমাৰ পৰিৱৰ্তে এনে আঁচনিৰ প্ৰতি আকৰ্ষিত হৈছিল টকা ঘূৰাই পোৱাকৈ বিনিয়োগৰ সুবিধাটো থকাৰ বাবেই।যিহেতু এই আঁচনিকেইখন টু ইন ৱান বিত্তীয় দ্ৰব্য, য’ত বীমা আৰু বিনিয়োগ দুয়োটাই জড়িত হৈ আছে, হঠাৎ বন্ধ কৰি নিদিব। পলিচীৰ প্ৰিমিয়াম সময়মতে নিদিয়া মানেই জীৱন বীমাৰ বেষ্টনীৰ পৰা আপুনি আঁতৰি যাব। যিটো হোৱা অনুচিত। উল্লেখযোগ্য যে এই অসুবিধাটোৰ বাবেই ব্যক্তিগত বিত্তীয় পৰিকল্পনাত বীমা আৰু বিনিয়োগ পৃথক কৰি ৰাখিবলৈ উপদেশ দিয়া হয় যাতে বিনিয়োগৰ সিদ্ধান্ত আপোনাৰ সুবিধা অনুসৰি ল’ব পৰা যায়।উপদেশ দিয়া হয় – জীৱন বীমাৰ বাবে টাৰ্ম ইনচুৰেন্স আৰু নিজৰ উপযোগীকৈ বিনিয়োগবোৰ হোৱা উচিত।

     এতিয়া আহক মিউচুৱেল ফাণ্ডত চিপৰ জৰিয়তে ইকুইটি ফাণ্ডত হৈ থকা বিনিয়োগখিনিলৈ।সাধাৰণ অৱস্থাত আপোনাক কেতিয়াও নকলো হয় চিপ বন্ধ কৰক। বৰঞ্চ কলোঁহেঁতেন – পাৰিলে পৰিকল্পনা কৰি অধিক বিনিয়োগ কৰক।যিহেতু বিত্তীয় সিদ্ধান্ত নিজৰ বিত্তীয় স্বাস্থ্যৰ ওপৰত নিৰ্ভৰশীল, ইকুইটি ফাণ্ডলৈ মাহেকীয়া ব্যৱধানত গৈ থকা টককেইটাৰ বৰ্হিগমণ আপুনি বন্ধ কৰিব পাৰে। ইয়াৰ বাবে কোনো শাস্তি নাই বা বিনিয়োগৰ পৰা টকা কটাৰ ভয় নাই। মিউচুৱেল ফাণ্ডত সেইটোৱে সুবিধা, বিনিয়োগকাৰীৰ বাবে সুবিধাজনক, নমনীয়। কিন্তু এইখিনিতে দুহাৰিছোঁ – বজাৰৰ এই মন্দা অৱস্থাত মই বিনিয়োগ হৈ থকা ধনখিনি উলিয়াই আনিবলৈ কোৱা নাই। চিপত নতুন বিনিয়োগহে সাময়িকভাৱে বন্ধ কৰিবলৈ কৈছোঁ।

     বিনিয়োগ চলাই যাবলৈ অসুবিধা নোহোৱা সকলৰো বহুতে মোক প্ৰশ্ন কৰিছে – তেওঁলোকৰ ইকুইটি ফাণ্ডৰ চিপবোৰ বন্ধ কৰি দিয়া ভাল হ’ব নেকি? পিছত ভাল দিন আহিলে আকৌ বিনিয়োগ কৰিব। এনেকুৱা প্ৰশ্ন আপোনাৰ মনতো যদি উদয় হৈছে প্ৰথমে চিন্তা কৰক – কেনে বিনিয়োগ পৰিকল্পনাৰে আপুনি চিপ আৰম্ভ কৰিছিল। যদি সেয়া আৰম্ভ কৰা হৈছিল দীৰ্ঘ সময়ৰ বিনিয়োগ হিচাপে, সেই লক্ষ্য যদি এতিয়াও বহুত দূৰত, বিনিয়োগ অব্যাহত ৰাখক। চিপ হিচাপে ইকুইটি মিউচুৱেল ফাণ্ডত বিনিয়োগ কৰাৰ এটা উদ্দেশ্য আছিল আপুনি বজাৰৰ ভাল আৰু বেয়া দুয়োটা সময়তে বিনিয়োগ অব্যাহত ৰাখিব।বজাৰৰ ভালৰ দিনত মিউচুৱেল ফাণ্ডৰ দামো বাঢ়ে। সেয়ে একমাত্ৰ এনে দিনত কৰা বিনিয়োগে আপোনাক যথাযথভাৱে উপকৃত নকৰিব।মিউচুৱেল ফাণ্ডৰ ইউনিট কম দামত কিনিবলৈ বজাৰৰ বেয়া দিনত অৰ্থাৎ নেভ (NAV) কম হৈ থাকোতেও বিনিয়োগ অব্যাহত ৰাখিবই লাগিব।

     নতুন বিনিয়োগকাৰীসকলৰ বাবে কথাখিনি অলপ বৰ্ণনা কৰিছোঁ। ধৰক, এটা ফাণ্ডৰ সেই দিনটোত মূল্য (নেট এছেট ভেলু, চমুকৈ নেভ) আছিল ১০ টকা। ১০০০ টকাৰে আপুনি সেই মূল্যত ১০০ টা ইউনিট কিনিলে। অৰ্থাৎ ১০ X ১০০ = ১,০০০। বজাৰলৈ বেয়া দিন আহিল। ১০ টকাৰ নেভ গৈ ৫ টকা হ’ল। অৰ্থাৎ আপোনাৰ বিনিয়োগৰ বজাৰ মূল্য হ’লগৈ ৫ X ১০০ = ৫০০ টকা। ৫০ শতাংশ লোকচান আপোনাৰ বিনিয়োগত। কিন্তু আপুনি সেই দিনটোতো পুনৰ ১০০০ টকা বিনিয়োগ কৰিলে।এইবাৰ ইউনিট পালে ২০০ টা।অৰ্থাৎ ৫ X ২০০ = ১,০০০। আপোনাৰ মুঠ ইউনিট হ’লগৈ ১০০+২০০=৩০০ টা।কেইবছৰমানৰ পাছত সেই ফাণ্ডটোৰ নেভ হ’লগৈ যেনিবা ২০ টকা। আপোনাৰ মুঠ বিনিয়োগৰ বজাৰ মূল্য তেতিয়া হ’বগৈ – ২০ X ৩০০ = ৬,০০০ টকা। ধৰক, আপুনি সেই বেয়া সময়ত নতুনকৈ বিনিয়োগ কৰিবলৈ ভয় কৰিলে। কিন্তু ইতিমধ্যেই বিনিয়োগ হৈ থকা টকাখিনি উলিয়াই লৈ যোৱা নাছিল। এনে অৱস্থাত আপোনাৰ বিনিয়োগৰ বজাৰ মূল্য হ’লহেঁতেন ২০ X ১০০ = ২০০০ টকা।বেয়া দিনত ইকুইটিত বিনিয়োগ কৰাৰ সুফল চাওক। যিহেতু আমি ইকুইটি বজাৰৰ ভাল বা বেয়া দিন কেতিয়া আহিব আৰু এনে দিনৰ দৈৰ্ঘ কিমান হ’ব তাক সঠিককৈ পূৰ্বানুমান কৰিব নোৱাৰোঁ, সেয়ে নিয়মানুৱৰ্তীতাৰে সৈতে প্ৰতি মাহৰ আয়ৰ পৰা এটা অংশ বিনিয়োগৰ ফালে নিবৰ বাবে মিউচুৱল ফাণ্ডৰ চিপ এটা সুন্দৰ পদ্ধতি।

*********

দেশত লক ডাউন এতিয়াও শেষ হোৱা নাই। চকুৰে নেদেখা শত্ৰুৰ বিৰুদ্ধে সমগ্ৰ বিশ্বই সৰ্ব শক্তিৰে যুঁজিছে।জনস্বাস্থ্যৰ গুৰুত্ব এতিয়া সৰ্বোচ্চ। এৰা, দেহা থাকিলেহে বেহা।কিন্তু এই দুঃসময় অতিক্ৰম কৰি আমি আগুৱাই যাবলৈ কৰা পৰিকল্পনাত অৰ্থনীতিৰ কথাও সমান্তৰালভাৱে চকু ৰাখিব লাগিব। সেয়ে এই সময়ত আমাৰ বিত্তীয় স্বাস্থ্যৰ কথাও চিন্তা চৰ্চালৈ অনাটো আৱশ্যক।

প্ৰথম কথা – অনাগত সময়ত আপোনাৰ উপাৰ্জনত কভিড-১৯ য়ে পেলাব পৰা প্ৰভাৱ কেনেকুৱা? যদি উপাৰ্জন কম হোৱাৰ সম্ভাৱনা আছে, প্ৰথমে চকু দিয়ক আপোনাৰ আপদকালীন পুঁজিত বৰ্তমান কিমান টকা আছে। যিসকল পাঠক এই ‘আপদকালীন পুঁজি’ ধাৰণাটোৰ সম্বন্ধে অবগত নহয় তেওঁলোকৰ বাবে অলপ বৰ্ণনাৰ আৱশ্যক হ’ব। কিবা কাৰণত আমাৰ উপাৰ্জন হঠাতে বন্ধ হ’লেও খৰচৰ প্ৰয়োজনখিনি কিন্তু প্ৰায় একেই থাকে। সেয়ে এক নিদিষ্ট দিনলৈ নিয়মীয়া উপাৰ্জন নহ’লেও চলিব পৰাকৈ এটা পুঁজি আমাৰ থকা উচিত।ব্যক্তিগত বিত্তীয় কথা-বতৰাত ইয়াকে আপদকালীন পুঁজি বোলা হয়।

এতিয়া স্বাভাবিকতে প্ৰশ্ন আহিব – কিমান দিনৰ খৰচৰ বাবে সাজু হোৱা উচিত? দুজন ব্যক্তিৰ ক্ষেত্ৰত এই সময় ভিন্ন হ’ব পাৰে। চৰকাৰী আৰু বেচৰকাৰী খণ্ডত নিয়োজিত দুজন চাকৰিয়ালৰ কথাকে ধৰক। চৰকাৰী খণ্ডৰ নিয়মীয়া চাকৰিয়াল এজনৰ সময়মতে দৰমহা পোৱাৰ নিশ্চয়তা এজন ব্যক্তিগত খণ্ডত কাম কৰা ব্যক্তিতকৈ বেছি। সেয়ে চৰকাৰী চাকৰীয়ালজনে আপদকালীন পুঁজিৰে অলপ কম দিনৰ বাবে সাঁজু হ’লেও সেয়া যথাযথ বুলি ক’ব পাৰি। সাধাৰণতে ৩ মাহৰ পৰা ৬ মাহলৈকে আমাৰ খৰচৰ পৰিমাণটো এই পুঁজিৰ অন্তঃগত হোৱা উচিত।আপোনাৰ ঘৰখন চলিবলৈ মাহেকত যদি ৩০ হাজাৰ টকাৰ প্ৰয়োজন আৰু আপুনি ৬ মাহৰ খৰচেৰে আপদকালীন পুঁজি তৈয়াৰ কৰিব খোজে তেন্তে আপোনাক প্ৰয়োজন হ’ব ৩০,০০০ X ৬ = ১,৮০,০০০/- টকা।

এইখিনিতে উত্থাপন হ’ব পৰা প্ৰশ্নটো হ’ল – ক’ত থম এই পুঁজি? উত্তৰ – এই ধন সহজে পাব পৰা হ’ব লাগে। অৰ্থাৎ এই পুঁজিৰ ধন ইকুইটিৰ দৰে দীৰ্ঘম্যাদী বিনিয়োগৰ বাবে উপযোগী সম্পদ শ্ৰেণীত ৰখা উচিত নহয়।এই সময়ৰ কথাকেই ধৰক।বিশ্বজুৰি শ্বেয়াৰ বজাৰ মন্দা।এতিয়া যদি কিবা প্ৰয়োজনত আপোনাৰ ইকুইটি সম্পদশ্ৰেণীত থকা বিনিয়োগ ভাঙিব লগা হয় তেন্তে লোকচান হোৱাৰ সম্ভাৱনাই অধিক। আপদকালীন পুঁজি বেংকৰ ছেভিংছ একাউণ্ট, লিকুইড মিউচুৱেল ফাণ্ড, হ্ৰ্স্বকালীন ফিক্সড ডিপ’জিট,  হ্ৰস্বকালীন ডেট ফাণ্ড আদিত ৰখা উচিত।অন্য এটা গুৰুত্বপূৰ্ণ কথা হ’ল – এই বিনিয়োগত আমি ৰিটাৰ্নৰ কথাটো একেবাৰে কম গুৰুত্ব দিয়া ভাল। সৰ্বোচ্চ গুৰুত্ব পোৱা উচিত এই পুঁজি যেন লাগ বুলিলেই পাব পাৰো আৰু দেশৰ অৰ্থনীতিৰ বেয়া সময়তো ঋণাত্মক ৰিটাৰ্ন যাতে চাবলগীয়া নহয়।

এতিয়াও যদি আপদকালীন পুঁজিৰ আপুনি পৰিকল্পনা কৰা নাই তেন্তে আৰম্ভ কৰক। ব্যক্তিগত বিত্তীয় পৰিকল্পনাত প্ৰথম কামটোৱেই হৈছে এই আপদকালীন পুঁজি গঠন। ইয়াৰ অৱৰ্তমানত আপোনাৰ দীৰ্ঘম্যাদী লক্ষ্যৰ বাবে কৰা বিনিয়োগবোৰত বেয়া সময়ত হাত দিব লগা হোৱাৰে সম্ভাৱনা প্ৰকট হৈ পৰে। প্ৰথমে চকু দিয়ক আপোনাৰ ছেভিংছ একাউণ্টলৈ। ধৰক, আপুনি এজন অসম চৰকাৰৰ চাকৰীয়াল। বেংকৰ ছেভিংছ একাউণ্টত মাত্ৰ এমাহৰ জোখাৰে অতিৰিক্ত টকা আছে।অৰ্থাৎ অহা মাহত দৰমহা নাপালেও চলিব পাৰিব। আপুনি বিচাৰিছে অন্তত: তিনিমাহৰ জোখাৰে এই পুঁজি গঠন হওক যাতে কিবা কাৰণত তিনিমাহ দৰমহা নাপালেও আপোনাৰ ঘৰখন চলোৱাত অসুবিধা নহয়। উপায়? যিহেতু আয় বঢ়াৰ সম্ভাৱনা নাই আমি খৰচত হাত ধৰিব লাগিব। লক ডাউনৰ সময়ত কৃষি, উদ্যোগ আদি সকলো খণ্ড সাংঘাতিক লোকচানৰ সন্মুখীন হৈছে। সেয়ে আহিবলগীয়া সময়ত অত্যাৱশ্যকীয় সামগ্ৰী সমূহৰো দাম বৃদ্ধি হোৱাৰ সম্ভাৱনা অধিক। এতেকে এৰাব নোৱৰা খৰচবোৰ বৃদ্ধি হ’ব অনাগত সময়ত।সেয়ে যিবোৰ খৰচত হাত ধৰিব পাৰি সেইবোৰ কম কৰিবলৈ চেষ্টা কৰক।

অত্যাৱশ্যকীয় কামকাজ চলাই দেশৰ অৰ্থনীতিৰ ইঞ্জিনটো চৰকাৰে ঘূৰাবলৈ যত্ন কৰিলেও কিছুমান খণ্ডত যে ভাল দিন ঘূৰি আহিবলৈ যথেষ্ট সময়ৰ আৱশ্যক হ’ব সেয়া নিশ্চিত। উদাহৰণ স্বৰূপে নাম ল’ব পাৰি পৰ্যটন খণ্ডটোৰ ওপৰত নিৰ্ভৰশীল ব্যৱসায়বোৰ। এনে খণ্ডৰ বেচৰকাৰী প্ৰতিষ্ঠানত চাকৰীয়াল এজনে সাময়িকভাৱে সংস্থাপন হেৰুৱাব লগা হ’ব পাৰে। এনে সম্ভাৱনা থকা ব্যক্তিয়ে বৰ্তমান অন্ততঃ এবছৰীয়া  আপদকালীন পূঁজি গঠন কৰাটো আৱশ্যক বুলি মই ভাবো। এই ক্ষেত্ৰত নিশ্চিতভাৱে অন্য লক্ষ্যলৈ বুলি জমা কৰা পুঁজিত আপুনি হাত দিব লগা হ’ব পাৰে। উদাহৰণ স্বৰূপে নতুন গাড়ী এখন কিনাৰ বাবে যদি টকা সঞ্চয় কৰিছিল, এই লক্ষ্যৰ সময় পিচলৈ ঠেলক। টকাকেইটা খৰচ কৰি নেপেলাব। এতিয়াও নহ’বগৈ? আপুনি ইঞ্চুৰেন্স আৰু বিনিয়োগবোৰ বন্ধ কৰি দিয়াৰ কথা ভাবিছে নেকি? ৰ’ব, পৰিকল্পনাৰ আৱশ্যক আছে। অহা খণ্ডত এই বিষয়ে আলোচনা কৰিম।

*********

বছৰটোৰ শেষ লেখা এইটো।সেয়ে মিউচুৱেল ফাণ্ড বিষয়ক শৃংখলাটোক আজি বিৰতি দিলো।তাৰ পৰিবৰ্তে আপোনাক এটা হেঁচুকনি দিব খুজিছো যাতে এখন্তেক ৰৈ নিজৰ স্থিতি জানিবলৈ আপুনি আগ্ৰহী হৈ উঠে আৰু নতুন বছৰটোত ব্যক্তিগত বিত্তীয় পৰিকল্পনাৰ কৰ্মসূচী তৈয়াৰ কৰিবলৈ এটা যুক্তি বিচাৰি পায়।

প্ৰথম কথা – নিজৰ এটা আপদকালীন পুঁজি আপোনাৰ তৈয়াৰ হৈ আছেনে যাতে লাগ বুলিলে সাধাৰণতে প্ৰয়োজন হোৱা টকাৰ বাবে আপুনি চিন্তা কৰিবলগা নহয়? যদি এতিয়াও এই বিষয়ত মন দিয়া নাই, ভাবক। সাধাৰণতেই দেখা যায় যে প্ৰয়োজনত নিজৰ দীৰ্ঘম্যাদী বুলি ভাবি কৰা বিনিয়োগ ভাঙিবলগাত পৰে।ফলত সেই লক্ষ্যবোৰৰ বাবে কৰা বিনিয়োগ বাধাগ্ৰস্ত হয়।কেতিয়াবা সেই লোকচান কাহানিও পূৰণ নহয়। সেয়ে এনে এটা সংখ্যাৰ টকা হাততে পোৱাকে বেংক বা মিউচুৱেল ফাণ্ডত জমা ৰাখক যাতে প্ৰয়োজনত আপুনি প্ৰথম হাত মেলোতেই পায়।সংখ্যাটো অন্ততঃ আপোনাৰ তিনি মাহৰ ঘৰুৱা খৰচতকৈ কম হ’ব নালাগে।

ঘৰখনৰ সকলো সদস্যৰ বাবে স্বাস্থ্য বীমা আছে নহয়? চাব যাতে সংখ্যাটো এনে হোৱা উচিত যাতে আজিৰ তাৰিখত চিকিৎসাৰ বাবে বীমাৰ টকা যথাযথ হয়।মনত ৰাখিব ভাৰতত দিনকদিনে চিকিৎসা ব্যয় বাঢ়িব লাগিছে। সেই বৃদ্ধিৰ হাৰ সাধাৰণ মুদ্ৰাস্ফীতিতকৈ বেছি। সেয়ে দুই-তিনি বছৰৰ মূৰেমূৰে বীমা আৱেষ্টনীৰ সংখ্যাটো বঢ়াই নিয়ক।

জীৱন বীমা ? আছে নহয় আপোনাৰ ? কিমান পৰিমাণৰ ?মই আপুনি কিমান টকাৰ প্ৰিমিয়াম দিয়ে সেয়া সোধা নাই। মই সুধিছো কিমান টকাৰ বীমা আৱেষ্টনীৰে আপুনি পৰিবেষ্টিত যে আপোনাৰ অবৰ্তমানত আপোনাৰ উপাৰ্জনৰ ওপৰত নিৰ্ভৰশীলকেইজন বীমাৰ পৰা পোৱা টকাৰে চলি যাব পাৰিব?অংকটো এবাৰ কৰি চাওক আৰু যদি কমি আছে, তেন্তে টাৰ্ম ইন্সিওৰেন্সৰ জৰিয়তে সেই ব্যৱধান পূৰণ কৰক।

কিছুমান ৰোগ আছে যাৰ অনাকাংক্ষিত আগমনে ঘৰ এখনৰ বিত্তীয় অৱস্থাত সাংঘাতিক বেয়া প্ৰভাৱ পেলায়।তেনে ৰোগৰ চিকিৎসাত স্বাস্থ্য বীমাৰ টকাকেইতাই সম্পূৰ্ণ সকাহ দিব নোৱাৰে। তেনে পৰিস্থিতিৰ মোকাবিলা কৰিবলৈ জটিল ৰোগৰ বীমা(ক্ৰিটিকেল ইলনেছ ইন্সিওৰেন্স)বৰ উপযোগী।যদি এতিয়াও এই বিষয়ে চিন্তা কৰা নাই, নতুন বছৰত বিষয়টোলৈ চকু দিয়ক।

বিনিয়োগ নিশ্চয় আপুনিও কৰে। ৰ’ব মই সোধা নাই কোনখন আঁচনিত কিমান কৰে।ভাল আঁচনিত বিনিয়োগ কৰিলে উপকৃত নিশ্চয় হ’ব।কিন্তু এইখিনতে গুৰুত্বপূৰ্ণ যে সেই বিনিয়োগৰ লক্ষ্যবোৰৰ বাবে আপুনি কৰি যোৱা বিনিয়োগবোৰ উপযোগী হৈছে নে নাই।ধৰক আপুনি নিজৰ অৱসৰ দিনৰ কথা ভাবি পি পি এফত টকা জমা কৰি যায়।ভাল কথা, এক চৰকাৰী গেৰাণ্টি থকা বিত্তীয় দ্ৰব্য পি পি এফ।কিন্তু আপুনি দুই-তিনি বছৰ পিচত প্ৰয়োজন হ’ব পৰা লক্ষ্যৰ বাবে বা হঠাতে উদ্ভৱ হ’ব পৰা প্ৰয়োজনৰ বাবে ইকুইটি মিউচুৱেল ফাণ্ডত জমা কৰে।লক্ষ্য কৰক, দীৰ্ঘম্যাদী লক্ষ্যৰ বাবে আপুনি ঋণজাতীয় সম্পদৰ ওপৰত নিৰ্ভৰশীল আৰু হ্ৰস্বম্যাদী লক্ষ্যৰ বাবে বজাৰকেন্দ্ৰিক উচ্চ ৰিস্কবিশিষ্ট বিত্তীয় দ্ৰব্যত বিনিয়োগ কৰিছে।কিন্তু আপোনাৰ বাবে উপযোগী কৌশল হ’লহেঁতেন যদিহে আপুনি ইকুইটি মিউচুৱেল ফাণ্ডক আপোনাৰ দীৰ্ঘম্যাদী বিত্তীয় লক্ষ্যৰ বাবে কৰা বিনিয়োগৰ অংশ কৰে।যদি আপোনাৰ হাতত ২০ বছৰ সময় আছে, কিন্তু ইকুইটিত বিনিয়োগ কৰা নাই আপোনাক অধিক টকাৰ প্ৰয়োজন হ’ব লক্ষ্যত উপনীত হ’বলৈ।কাৰণ ঐতিহাসিক তথ্যৰ ভিত্তিত আমি দেখিছো যে ইকুইটিয়ে আন সম্পদ শ্ৰেণীতকৈ অধিক ৰিটাৰ্ন দিয়ে।ভাৰতৰ প্ৰেক্ষাপটত দীৰ্ঘম্যাদী বিনিয়োগত ইকুইটিৰ পৰা আপুনি ১২ ৰ পৰা ১৫ শতাংশ ৰিটাৰ্ন আশা কৰাটো যুক্তিসংগত।ইফালে পি পি এফত চৰকাৰী গেৰান্টি থাকিলেও ইয়াতো সুত চৰকাৰে আজিকালি একে নাৰাখে।দেশত চলি থকা সুত চক্ৰৰ ওপৰত নিৰ্ভৰ কৰি কম বা বেছি কৰে চৰকাৰে।সেইবাবে দীৰ্ঘ সময়ত আপুনি পি পি এফৰ পৰা ৰিটাৰ্ন ৮ শতাংশৰ আশে-পাশেহে আশা কৰা উচিত।

কেতিয়াবা এনে নহয় নে আপুনি ৰেকাৰিং ডিপ’জিট বা মিউচুৱেল ফাণ্ডত কোনো বিশেষ উদ্দেশ্য আগত নাৰাখি বিনিয়োগ কৰি গৈছে দীৰ্ঘদিন ধৰি। কিন্তু প্ৰত্যেকটো প্ৰয়োজনত তাত হাত দিছে।শেষত এদিন অনুভৱ কৰিছে কিছুমান সাময়িক সকাহৰ বাদে সময়ৰ জোখাৰে দূৰৈত থকা লক্ষ্যবোৰৰ বাবে আশা কৰাধৰণে পুঁজি গঠন হোৱা নাই আপোনাৰ।উত্তৰ যদি ধনাত্মক, আপোনাৰ লক্ষ্যবোৰক সময়ৰ মাপেৰে সজাওক – কোনবোৰ দীৰ্ঘম্যাদী আৰু কোনবোৰ হ্ৰস্বম্যাদী। সেই অনুযায়ী উপযুক্ত বিত্তীয় দ্ৰব্যত কৰা বিনিয়োগেৰে লক্ষ্যক উদ্দেশ্যি আগুৱাই যাওক।মনত ৰাখিব, দীঘলীয়া বিনিয়োগত আপুনি ৰিস্ক লোৱা ভাল, সেয়ে ইকুইটি তাৰ অংশ হ’লে উপকৃত হ’ব।দীৰ্ঘ সময়ত মুদ্ৰাস্ফীতিক অতিক্ৰম কৰা ৰিটাৰ্ন পাবলৈ ইকুইটি উপযোগী। ইয়াৰ বিপৰীতে কম দূৰত্বত থকা লক্ষ্যৰ বাবে কৰা বিনিয়োগত আপোনাৰ বাবে গুৰুত্বপূৰ্ণ আপুনি কৰা বিনিয়োগৰ মূলটোৰ যাতে হৰণ-ভগন নহয়, লাগিলে ৰিটাৰ্ন কম নহওকেই বা কিয়।বৰ্তমানলৈকে যদি কোনো লক্ষ্য আগত ৰাখি ক’ৰবাত বিনিয়োগ কৰি গৈছে সেইবোৰে আপোনাক লক্ষ্যত উপনীত হোৱাত কিমান সহায় কৰিব সেই অংকটো কৰিবলৈ নাপাহৰিব।

নতুন বছৰে আপোনালৈ কঢ়িয়াই আনক সুখ আৰু সমৃদ্ধি।মোৰ ফালৰ পৰা সদৌটিলৈকে অফুৰন্ত শুভকামনা।

*****

সৰুতে নিয়মিতভাৱে চান্দমামা পঢ়িছিলো৷ সময় আশী দশকৰ প্ৰথম ভাগ৷ দেউতাৰ লগত যাওঁ এতিয়া অতীত হোৱা  ‘পুথিঘৰ’ নামৰ লখিমপুৰ চহৰৰ গ্ৰন্থ বিপণীখনলৈ৷ এই মাহৰ চান্দমামাখন আহিল নেকি বুলি সোধা প্ৰশ্নৰ উত্তৰত ভূঞা খুৰাই মূৰ দুপিয়ালে যি পুলক অনুভৱ কৰিছিলো, তাক আজিও পাহৰিব পৰা নাই৷ এই লেখাটোৰ পৰিকল্পনা কৰোতে হঠাৎ মোৰ মনলৈ অহা শব্দ দুটা আছিল ‘হেজাৰপতি’ আৰু ‘লাখপতি’৷ যিমান দূৰ মনত পৰে শব্দ দুটাৰ সৈতে চিনাকি হৈছিলো শিশু গল্প আলোচনীখনৰ পাততেই৷ কোনো গল্পত দুজন অৰ্থৱান মানুহক বুজাবলৈ কৰা বৰ্ণনাৰ অংশ আছিল এই বিশেষ্য দুটা৷ হেজাৰপতি অৰ্থাৎ হেজাৰ হেজাৰ টকাৰ মালিক৷ লাখপতি অৰ্থাৎ লাখ লাখ টকাৰ মালিক৷ লাখপতি বাৰু যেনতেন, হেজাৰপতিক আজিৰ যুগত নিশ্চয় অৱস্থাপন্ন বুলি আখ্যা দিব নোৱাৰি৷ হেজাৰ টকা শেষ হ’বলৈ কিমান পৰ? হয়তো তাহানিৰ হেজাৰপতিৰ স্থান আজিৰ লাখপতিয়ে ল’লে আৰু তাহানিৰ লাখপতিৰ স্থান ল’লে আজিৰ কোটিপতিয়ে৷

চেম্বাৰত মোৰ মুখামুখিকৈ বহি থকা ৩০ বছৰীয়া ব্যক্তিজনে ৬০ বছৰ বয়সত অৱসৰ ল’ব খোজে৷ তেওঁৰ প্ৰয়োজন এটা অৱসৰ পৰিকল্পনাৰ৷

ঃ আপোনাক ৬০ বছৰ বয়সত কিমান টকাৰ প্ৰয়োজন হ’ব বুলি ভাবে, যিখিনি টকাৰে নেকি আপুনি আজীৱন অসুবিধা নোপোৱাকৈ চলি যাব পাৰে? যুৱকজনৰ প্ৰয়োজনৰ প্ৰতি থকা ধাৰণাটোক বুজিবলৈ প্ৰশ্নৰ অৱতাৰণা কৰিলো৷

: এক কোটিমান লাগিব কিজানি৷ আপুনি কি কয়? যুৱকৰ উত্তৰ আৰু প্ৰতিপ্ৰশ্ন৷ অনুমান হ’ল তেওঁ বিশেষ নভবাকৈ সংখ্যাটো মুখত লৈছে৷ কাৰণ কোটি এতিয়াও বহু টকা৷ সেয়ে কোটিৰ এতিয়াও এটা  ৰোমাণ্টিক আবেদন আছে৷

: চাওক, ২০১৫ চনৰ এক কোটি আৰু ২০৪৫ চনৰ এক কোটি একেই নহয় কিন্তু ৷ মুদ্ৰাস্ফীতিৰ বাবে টকাই নিজৰ ক্রয় ক্ষমতা হেৰুৱায়৷ ৩০ বছৰৰ পিচৰ এক কোটি টকাক আজিৰ মূল্যত চাবলৈ হ’লে আমি মুদ্ৰাস্ফীতিক গণ্য কৰিব লাগিব৷ ধৰক সন্মুখত থকা সমগ্ৰ ৩০ বছৰত গড় হিচাপে মুদ্ৰাস্ফীতিৰ হাৰ যদি ৮ শতাংশ হয, তেন্তে ২০৪৫ চনৰ এক কোটি টকাৰ বৰ্তমান মূল্য হ’ব প্ৰায় ১০ লাখ৷ অৰ্থাৎ আজিৰ ১০ লাখ টকাৰে যিখিনি দ্ৰব্য আৰু সেৱা কিনিব পাৰিম, ২০৪৫ চনত একেখিনি দ্ৰব্য আৰু সেৱা ক্রয় কৰিবলৈ এক কোটি টকা লাগিব৷ এতিয়া আপোনাৰ প্ৰয়োজনীয়তাৰ দিশৰ পৰা চাবলৈ গ’লে প্ৰশ্নটো হ’ব এনেকুৱা – আজিৰ ৬০ বছৰীয়া মানুহ এজনৰ হাতত দহ লাখ টকা তুলি দিলে যি স্বচ্ছন্দ্যতাৰে অৱসৰ জীৱন নিৰ্বাহ কৰিব পাৰিব, তেনে আৰ্থিক মানৰ জীৱন যাত্ৰা আপোনাৰ কাম্য হয় নে নহয়?

একেলগে দীঘলীয়াকৈ কথাখিনি কৈ উত্তৰ বিচাৰি যুৱকজনৰ চকুলৈ চালো৷ যুৱকৰ চকুত আশ্বৰ্যৰ প্ৰতিফলন৷ তেওঁ যেন বিশ্বাসেই কৰিব পৰা নাই ২০৪৫ চনৰ এক কোটি আৰু ২০১৫ চনৰ ১০ লাখৰ মূল্য সমান বুলি আগবঢ়োৱা মোৰ ব্যাখ্যা৷ সাধাৰণতেই এনে হয় আৰু সেইবাবেই মই গুৰুত্ব দিওঁ প্ৰথমে পৰিকল্পনাক৷ তাৰ পিচতহে বিনিয়োগ৷ ভৱিষ্যৎ দিনৰ টকাৰ সংখ্যা এটা যথেষ্ট হ’ব বুলি আধাৰবিহীনভাৱে অনুমান কৰি আগবঢ়া বিনিয়োগে আপোনাক চৰম শ’লঠেকত পেলোৱাৰ সম্ভাৱনা প্ৰবল৷ তাতে অৱসৰৰ পৰিকল্পনা৷ মানুহ এজনে উপাৰ্জন কৰি থকা দিনবোৰৰ কথা অলপ বেলেগ৷ প্ৰয়োজনৰ টকা কমিলে বেলেগ উৎস বা উপাৰ্জনৰ পৰা আনি কম হোৱা টকাখিনি মিলাবলৈ সুবিধা থাকে৷ বৰ প্ৰয়োজনত ধাৰো কৰিব পাৰি৷ অৱসৰৰ পিচত কিন্তু গোটেই কথাবোৰ সুকীয়া হৈ যায়৷ কাৰণ ধন প্ৰৱাহ আগৰ দৰে হৈ নাথাকে৷ সেয়ে ‘টকাৰ সময় মূল্য’ ধাৰণাটোৰ পৰা সম্ভাব্য মুদ্ৰাস্ফীতিৰ গাত ভেজা দি সেইটো কোন চনৰ টকা আৰু তাৰ বৰ্তমান মূল্য কিমান তাক জানিবলৈ বিনিয়োগ কৰাৰ পূৰ্বেই যত্ন কৰা উচিত৷

প্ৰিয় পাঠক, সামগ্ৰিকভাৱে অৱসৰ পৰিকল্পনাৰ কথা আলোচনা কৰাটো আজিৰ উদ্দেশ্য নহয়৷ কিন্তু এই টকাক সময়ৰ ভিত্তিত মূল্যায়ন কৰিবলৈ নজনাটো যে কিমান বিপজ্জনক হ’ব পাৰে তাক উপলব্ধি কৰিবলৈ আপোনাক হেঁচুকি দিয়াটোৱেই মোৰ লক্ষ্য৷ এইবাৰ আহকচোন অন্য এটা দৃষ্টিকোণৰ পৰা ‘টকাৰ সময় মূল্য’ চাবলৈ যত্ন নকৰা বিনিয়োগ পদ্ধতি এটালৈ চকু দিওঁ৷ বয়সস্থ লোকসকলৰ মাজত বেংক ফিক্সড ডিপ’জিট জনপ্ৰিয়৷ দেখিছো, বহু বয়সস্থ লোকে পৰিকল্পনা কৰে ফিক্সড ডিপ’জিটৰ সুতেৰে মাহেকীয়া খৰচ চলাই নিবলৈ৷ ধাৰণা – সুতখিনি খৰচ কৰিম আৰু মূলখিনি মূল হৈ ৰৈ যাব৷ মোৰ মাও এই ধাৰণাৰ উৎসাহী প্ৰবক্তা৷ ধাৰণাটোক পৰীক্ষাগাৰলৈ আনো আহক৷ ধৰক ৬০ বছৰীয়া ব্যক্তি এজনৰ ৩০ লাখ টকা আছে৷ তেওঁৰ অৱসৰকালীন জীৱনৰ খা-খৰচৰ বাবে এই টকাখিনিক বাদ দি অন্য কোনো সম্বল নাই৷ তেওঁৰ পৰিকল্পনা – এই ৩০ লাখ টকাৰ ফিক্সড ডিপ’জিটৰ পৰা আহৰণ কৰা সুত মাহেকীয়াকৈ খৰচৰ বাবে ব্যৱহাৰ কৰিব৷ এনে কৰিলে ৩০ লাখ টকাৰ ৮ শতাংশ হাৰত বছৰি সুত হ’ব ২ লাখ ৪০ হেজাৰ টকা৷ অৰ্থাৎ আমি থূলমূলকৈ ক’ব পাৰো যে তেওঁৰ ছেভিংছ বেংক একাউণ্টত মাহিলি ২০ হেজাৰ টকাকৈ সোমাব৷ ২০১৫ চনৰ ২০ হেজাৰ টকাত তেওঁ সুখী৷ ব্যক্তিজনে অনাগত ৩০ বছৰ এনে পদ্ধতিৰে চলি যাম বুলি ভাবিছে৷ এইবাৰ আমি চাওঁ ২০২৫, ২০৩৫ আৰু ২০৪৫ চনৰ ২০ হেজাৰ টকাৰ মূল্য আজিৰ দিনটোত কি হ’ব, যদিহে সমগ্ৰ সময়খিনিত গঢ়ে ৮ শতাংশ হাৰত মুদ্ৰাস্ফীতি অব্যাহত থাকিব বুলি ধৰি লওঁ৷ অংকই কয় ২০২৫ চনৰ ২০ হেজাৰ টকাৰ মূল্য আজিৰ ৯,২৬৪ টকাৰ সমান৷ ২০৩৫ চনৰ ২০ হেজাৰ টকাৰ মূল্য আজিৰ ৪,২৯১ টকাৰ সমান আৰু ২০৪৫ চনৰ ২০ হেজাৰ টকাৰ মূল্য আজিৰ ১,৯৮৭  টকাৰ সমান৷ বেলেগে আৰু কিবা ব্যাখ্যা কৰাৰ প্ৰয়োজন আছে জানো?

*****

(লেখাটো পূৰ্বে অসমীয়া প্ৰতিদিন কাকতত ১৯ মার্চ, ২০১৫ তাৰিখে প্ৰকাশ পাইছিল)

এমাহৰ আগতে প্ৰকাশ হোৱা ‘৭২ ৰ নিয়ম আপুনি জানেনে?’ শীৰ্ষক লেখাটোৰ বাবে যথেষ্টসংখ্যক ব্যক্তিৰ পৰা ফোন পাইছো৷ বহুতে কৈছে এই সহজ নিয়মটোৰ বিষয়ে তেওঁলোক পূৰ্বতে অৱগত নাছিল৷ আজি সেই ৭২ ৰ নিয়মৰ জৰিয়তে আন কিছুমান দৰকাৰী কথা পৰ্যালোচনা কৰিব খুজিছো৷ যিসকলে পূৰ্বৰ লেখাটো পঢ়া নাছিল, তেওঁলোকৰ বাবে প্ৰথমে ৭২ৰ নিয়মটোক সংক্ষেপে পুনৰ ক’ব খুজিছো৷ কোনো বিনিয়োগ কেই বছৰত দুগুণ হ’ব তাক জানিবলৈ ৭২ ক সেই বিত্তীয় দ্ৰব্যবিধৰ ফলৰ হাৰেৰে হৰণ কৰক৷ ধৰক আপুনি যিটো দ্ৰব্যত বিনিয়োগ কৰিছে, তাৰ ফল বছৰি চক্রবৃদ্ধি হাৰত ৮ শতাংশ৷ এতিয়া৭২ ক ৮ ৰে হৰণ কৰক৷ উত্তৰ ওলাল ৯ অৰ্থাৎ ৯ বছৰত আপোনাৰ এই বিনিয়োগ দুগুণ হ’ব৷ আনহাতে ৭২ ক দুগুণ হ’বলগা বছৰৰ সংখ্যাৰে হৰণ কৰিলেও আমি পাম বাৰ্ষিক চক্রবৃদ্ধি ফলৰ হাৰ ৷ অৰ্থাৎ কোনো বিনিয়োগ যদি ৬ বছৰত দুগুণ হয়, তেন্তে বাৰ্ষিক চক্রবৃদ্ধি হাৰ পাবলৈ ৭২ ক ৬ ৰে হৰণ কৰিলেই হ’ল৷ উত্তৰ ওলাব ১২৷ ইয়াৰ অৰ্থ হ’ল কোনো বিনিয়োগ ৬ বছৰত দুগুণ হ’বলৈ হ’লে ১২ শতাংশ বাৰ্ষিক চক্রবৃদ্ধি হাৰত ফল পাব লাগিব৷ অৱশ্যে এটা কথা কৈ নথ’লে ভুল হ’ব যে ই এটা মোটামুটিধৰণৰ হিচাপহে৷ ফাইনেন্সিয়েল কেলকুলেটৰৰ দৰে সঠিক নহয়৷ কিন্তু ইয়াক আধাৰ হিচাপে লৈ কৰা আমাৰ পৰৱৰ্তী পৰ্যায়ৰ অংকবোৰে আমি পৰীক্ষা কৰিব বিচৰা কথাকেইটাৰ কিন্তু সঠিকভাৱেই দিক্‌ নিৰ্দেশনা কৰে৷ ফাইনেন্সিয়েল কেলকুলেটৰৰ অবিহনে সাধাৰণ পূৰণ-হৰণৰ জৰিয়তে কৰা এই পৰীক্ষাবোৰৰ গ্ৰহণযোগ্যতা তাতেই৷ আজি ৭২ৰ নিয়মৰ জৰিয়তে আমি তিনিটা সত্যৰ পৰীক্ষা কৰিব খুজিছো –  

(১) বিনিয়োগৰ আৰম্ভণি যিমান পাৰি সিমান সোনকালে কৰা কিয় ভাল৷

(২) চক্রবৃদ্ধি সুতৰ চমৎকাৰিতা কেনেধৰণৰ৷

(৩) দীৰ্ঘ দূৰত্বৰ বিনিয়োগত হিচাপ-নিকাচ কৰি গ্ৰহণ কৰা ক্ষতিভয় কিয় ফলদায়ক৷

ধৰক, বৈভৱ দাস আৰু বৈদুৰ্য দাস  দুজন যঁজা ককাই-ভাই৷ দুয়োজনে ২০১৪ চনৰ ৪ ডিচেম্বৰত ৬০ বছৰীয়া জন্মদিন একেলগে পাতিছে৷ একেই পৰিবেশত ডাঙৰ-দীঘল হোৱা সত্ত্বেও দুয়োজনৰে ক্ষতিভয় গ্ৰহণ কৰিব পৰা সক্ষমতা বেলেগ বেলেগ৷ বৈভৱ দাসে ঋণাত্মক ফল চাব নোৱাৰিছিল৷ সেয়ে ইকুইটিক তেওঁ পৰিহাৰ কৰি চলিছিল৷ ইফালে বৈদুৰ্য দাস আছিল এজন নিয়মানুৱৰ্তিতা থকা বিনিয়োগকাৰী৷ তেওঁ ফল আৰু ক্ষতিভয়ৰ সম্পৰ্ক বুজি পাইছিল৷ নিজৰ লক্ষ্যত উপনীত হ’বলৈ উপযুক্ত ক্ষতিভয় গ্ৰহণ কৰাত বৈদুৰ্য দাস পিচ নুহুঁহকিছিল৷

১৯৮৪ চনত তেওঁলোকৰ ৩০ বছৰীয়া জন্মদিনত দেউতাকে উপহাৰ হিচাপে দুয়োকে গাইপতি ১ লাখ টকা দিছিল আৰু কৈছিল এই টকা তোমালোকৰ অৱসৰৰ পৰিকল্পনাৰ অংশ হিচাপে ব্যৱহাৰ কৰিবা৷ বৈভৱ দাসে সেই টকাক ৮ শতাংশ হাৰত ফিক্সড ডিপ’জিট কৰি দিছিল৷ (যদিও প্ৰকৃততে সেই সময়ত ফিক্সড ডিপ’জিটৰ সুতৰ হাৰ ইয়াতকৈ বেছি আছিল, আমি চাব বিচৰা ভৱিষ্যতৰ প্ৰত্যাশিত ফলৰ লগত খাপ খুৱাবলৈ এই হাৰ ধৰা হৈছে)৷ ইয়াৰ বিপৰীতে বৈদুৰ্য দাসে এই টকাক ইকুইটি আৰু ঋণ সম্পদত এনেকৈ আবণ্টন কৰিছিল যাতে তেওঁৰ বাৰ্ষিক ফল ১২ শতাংশ হয়৷ এতিয়া আহক আমি চাওঁ বৈভৱ দাস আৰু বৈদুৰ্য দাসে তেওঁলোকৰ ২০১৪ চনৰ ৪ ডিচেম্বৰৰ ৬০ বছৰীয়া জন্মদিনটোত কিমান টকা লাভ কৰিব৷

দুয়োজনৰে হাতত সমান ৩০ বছৰ সময় আছিল৷ বৈভৱ দাসে যিহেতু ৮ শতাংশ হাৰত টকা জমা থৈছিল তেওঁৰ জমা ধন ৯ বছৰত দুগুণ হ’ব (৭২ ÷ ৮ = ৯)৷ সেয়ে তেওঁৰ টকা দুগুণকৈ বাঢ়িবলৈ ৩.৩৩ বাৰ সময় পাব (৩০ ÷ ৯ = ৩.৩৩) অৰ্থাৎ তেওঁৰ এক লাখ টকা ৩০ বছৰত ১০ লাখ ৬৪ হেজাৰ টকালৈ বৃদ্ধি পাব (১,০০,০০০ × ২ × ২ × ২ × ১.৩৩ = ১০,৬৪,০০০)৷ আয়কৰ কথা ইয়াত বিবেচনা কৰা হোৱা নাই ৷ অন্যহাতে বৈদুৰ্য দাসে যিহেতু ১২ শতাংশ ফলৰ বাবে পৰিকল্পনা কৰিছিল তেওঁৰ বিনিয়োগ ৬ বছৰত দুগুণ হ’ব (৭২ ÷ ১২ = ৬৷ অৰ্থাৎ ৩০ বছৰত বৈদুৰ্য দাসৰ বিনিয়োগে ৫ বাৰ দুগুণ হ’বলৈ সময় পাব (৩০ ÷ ৬ = ৫)৷ ৬০ বছৰীয়া জন্মদিনত বৈদুৰ্য দাসে পাব পৰা টকাৰ অংকটো হ’ব ৩২ লাখ (১,০০,০০০ × ২ × ২ × ২ × ২ × ২ = ৩২,০০,০০০৷ কথাখিনিক আমি এনেকৈও কব পাৰো যে ৩০ বছৰত বৈভৱ দাসৰ জমা ধন প্ৰায় ১০.৬৪ গুণ বৃদ্ধি পাব৷ অন্যহাতে সেই একে সময়তে বৈদুৰ্য দাসৰ  জমা ধন ৩২ গুণ বৃদ্ধি পাব৷ গোটেই বিনিয়োগৰ সময়ছোৱাত বৈভৱ দাসৰ এটাই তৃপ্তি আছিল যে তেওঁ কেতিয়াও ঋণাত্মক ফল চাবলগা নহৈছিল৷ কিন্তু ইয়াৰ বিপৰীতে বৈদুৰ্য দাসে বিনিয়োগৰ ওৰে বাটটোত ইকুইটি বজাৰৰ উত্থান-পতন হজম কৰিবলগা হৈছে৷ যিহেতু ইকুইটি বজাৰৰ ঐতিহাসিক চৰিত্ৰ অধ্যয়নৰ যোগেদি বৈদুৰ্য দাস পূৰ্বৰ পৰাই প্ৰস্তুত আছিল, সেয়ে তেওঁৰ বিনিয়োগৰ সময়ছোৱাত কোনো ধৰণৰ অশান্তি নাছিল৷ লক্ষ্য কৰক, সূদীৰ্ঘ সময়ত মাত্ৰ ৪ শতাংশ ফলৰ ইফাল-সিফালে শেষ ফলাফলত কি বিশাল পাৰ্থক্যৰ সৃষ্টি কৰে৷ যদি আমি মুদ্ৰাস্ফীতিৰ কথা পৰ্যালোচনালৈ আনো তেন্তে দেখিম যিহেতু যোৱা ৩০ বছৰৰ মুদ্ৰাস্ফীতিৰ হাৰো গড় হিচাপত প্ৰায় ৮ শতাংশ আছিল৷ বৈভৱ দাসৰ বিনিয়োগে প্ৰকৃতাৰ্থত মুদ্ৰাস্ফীতিক অতিক্রম কৰিব নোৱাৰিলে৷ অৰ্থাৎ ৩০ বছৰৰ আগেয়ে ১৯৮৪ চনত দেউতাকে দিয়া ১ লাখ টকাটোৰে সেই সময়ত যিখিনি সম্পদ কিনিব পাৰিলেহেঁতেন আজিৰ ১০ লাখ ৬৪ হেজাৰ টকাৰে প্ৰায় সমপৰ্যায়ৰ দ্ৰব্যহে কিনিব পাৰিব৷ কিন্তু ইয়াৰ বিপৰীতে ৩২ লাখ টকাৰ প্ৰাপ্তিৰে বৈদুৰ্য দাসৰ বিনিয়োগে মুদ্ৰাস্ফীতিকো অতিক্রম কৰিবলৈ সক্ষম হ’ল৷ যিটো দীৰ্ঘ দূৰত্বৰ বিনিয়োগত একান্ত প্ৰয়োজনীয়৷

ধৰক, বৈভৱ দাসে দেউতাকৰ পৰা পোৱা টকাখিনি বেংকৰ চেভিংছ একাউন্টতে ১২ বছৰ পেলাই ৰাখিছিল৷ পিচৰ ১৮ বছৰহে ফিক্সড ডিপ’জিট কৰিছিল৷ তেনে অৱস্থাতে বৈভৱ দাসৰ টকা ২০১৪ চনৰ ৪ ডিচেম্বৰত কিমান হ’ব জানিবলৈ বিচাৰে নেকি? যদি বেংকৰ ছেভিংছ একাউন্টৰ সুতৰ হাৰ ৪ শতাংশ বুলি ধৰা হয় তেন্তে প্ৰথম ১২ বছৰত তেওঁৰ টকা বাঢ়িছিল মাত্ৰ ৬৬ শতাংশ অৰ্থাৎ এক লাখ টকা হৈছিলগৈ ১ লাখ ৬৬ হেজাৰ টকা৷ পিচৰ ১৮ বছৰত মাত্ৰ দুবাৰহে দুগুণ হ’বলৈ সুবিধা পাব৷ তেনে অৱস্থাত ১৮ বছৰৰ পিচত ১ লাখ ৬৬ হেজাৰ টকা হ’বগৈ ৬ লাখ ৬৪ হেজাৰ টকা৷ অৰ্থাৎ মুঠতে এক লাখ টকা ৩০ বছৰত ৬.৬৪ গুণ বৃদ্ধি পালে৷ যাৰ বৃদ্ধি মুদ্ৰাস্ফীতিৰ বৃদ্ধিতকৈ যথেষ্ট কম৷ বৈদুৰ্য দাসে ১ লাখ টকাক ৩০ বছৰত ৩২ গুণ বৃদ্ধি কৰিবলৈ সাংঘাতিক কষ্ট কৰিবলগা হোৱা নাই৷ বৈদুৰ্য দাসৰ নিয়মানুৱৰ্তিতাৰ বাবে সময় আৰু চক্রবৃদ্ধি সুতে তেওঁৰ সপক্ষে নিৰন্তৰ কাম কৰি গ’ল৷ প্ৰিয় পাঠক, আপোনাৰ দীৰ্ঘম্যাদী বিনিয়োগ কেনেদৰে পৰিচালিত হৈছে? বৈভৱ দাস নে বৈদুৰ্য দাসৰ ষ্টাইলত? এবাৰ ভাবক৷

***********

( লেখাটো পূৰ্বতে অসমীয়া প্ৰতিদিনত ৪ডিচেম্বৰ, ২০১৪ তাৰিখে প্ৰকাশ পাইছিল)